وخايف أوعدك ماوفيش

من الحاجات اللي مهم تحاول تطبقها في حياتك عامة، كونسبت إنك Never overpromise & under deliver! حأول دايما ماتوعدش ولا تعشم حد بحاجة إنت مش متأكد إنك هتعرف تعملها، ومش بس تعملها.. تفوق توقعاته فيها! في شغلك بقى في علاقاتك الشخصية مع صحابك ولادك مراتك.. في أي حاجة! ماتعملش البحر طحينة وتعلي سقف توقعات اللي قدامك وتطيروا فوق السحاب وبعدين يجي في أرض الواقع يلاقيك صحرا.. عملت أقل بكتير مما وعدته! مفيش حاجة في الدنيا محبطة أكتر من إن سقف التوقعات يقع على نافوخ اللي قدامك ومش بسبب ظروف قهرية مفاجأة ولا حاجة.. بسبب إن إنت بتقول كلام كتير ومش بتعمله! وطبعا بيبقى في علاقة طردية بين حجم العشم وحجم الخازوق وبالتالي خيبة الأمل اللي الواحد بيبقى فيها! وللأسف لو فضلت ت overpromise كده هيحس مرة في مرة إنك بوء كبيرررر ومش أد كلامك وهيبطل يثق في أي حاجة هتقولها له مع الوقت!

الأحسن من كل ده إنك تخليك واقعي وواضح مع مشاعرك وظروفك واللي تقدر تعمله وبعدين تحاول ت go the extra mile في العطاء فاللي قدامك يتفاجأ ويتبسط! صدقوني مفيش أحلى من إن حد يقولك إن شغلك ولا هديتك ولا كلامك ولا أي حاجة عملتها كانت فوق ما هو تخيل إنك هتعمل! إنك تفوق التوقعات دي حاجة بتقربك من الناس جدا وبتديك مصداقية ورصيد كبير عندهم‪.