٢٠٢٠ علمتني إن

١- محدش بيموت من غير حد. اكتر شخص كنت متخيل إنك هتقطع شراينك لو بعدتم عن بعض، بتكمل بعده عادي وشراينك بتكمل معاك عادي برضه والدنيا مش بتقف مهما كنت زعلان!

٢- محدش بيشيل شيلتك مهما كان بيحبك، فماتعتمدش على حد لدرجة إنك تسيب إيدك. خليك دايما جاهز ومستعد وعارف إن المؤمن القوي خير وأحب إلى الله من المؤمن الضعيف.

٣- إستخير في كل حاجة وأي حاجة وخليك دايما مع ربنا وبتحسن الظن فيه مهما كنت مقصر

٤- كل الخطط اللي بتعملها دي ممكن في لحظة تتشقلب وتلاقي نفسك قاعد بالبيجاما.. بس برضه ماتبطلش تخطط! افرك واسعى وخبط على كل الأبواب مهما المردود أتأخر أو مكانش مضمون

٥- لا تنبهر اخي الكريم  لا بالناس ولا بالأشياء ولا بالأفعال.. فقط                        

Smile and wave.... Smile and wave boys

٦- اكتر حاجة بتخاف منها، لما بتحصل مش بتطلع مرعبة زي ما كنت متخيل.. فماتسحلش نفسك تفكير وخليها على ربنا.

٧- اللي مابيوقفش على ولادة معزته، بتجيب له كلب. وده مَثَل حد قالهولي معناه إنك تتابع بنفسك وتخليك مصحصح لشغلك/حياتك/صحتك الخ الخ بدل ما تلبس.   

٨- احنا غرقانين في نعم كتير أوي أهمها الستر والناس السالكة.

٩- إوعى تحكم على حاجة ماجربتهاش، عشان الدنيا هتلف وتلاقي نفسك بتعملها فاسكت وخليك في حالك. 

أخرج من حولك وقوتك لحول الله وقوته،

ثم استعن بالله.. ولا تعجز.. ولا تعجز.. ولا تعجز! ‪