من خواطر كورس Soulmates ...

أغلب الناس لما بتيجي تتجوز بتتشد للصفة اللي مش فيهم.. للحاجة الناقصة في شخصيتهم واللي أوقات كتير بتبقى عكسهم بالظبط. فتلاقيه هو مجنون وبتاع مخاطرة ومغامرات واتجوز واحدة هادية وراسية ورزينة في نفسها.. وتلاقيها هي رومانسية وعاطفية جدا واتجوزت واحد عملي وتقيل في نفسه كده.. وهكذا..

القصة دي طبيعية جدا ومن سنن الحياة ان opposites attract ودي نعمة من ربنا عشان نكمل بعض اصلا لأن مفيش حد فينا كامل..  بس المشكلة إننا لو مش مدركين القصة دي في الغالب اللي هيحصل إن نفس الصفة اللي شدتنا للطرف التاني من الأول هتبقى هي الصفة اللي بتنفرنا منه بعد شوية!

فهتلاقيه حب فيها هدوءها لكن مع الوقت بقى يشوفها مملة!

وتلاقيها حبت فيه انه عملي وتقيل بس بعد شوية بقت شايفاه مابيحسش ومش مهتم!

ونبدأ بقى دايرة الشكوى من ازاي الشخص ده مش شخصيتي خالص ومش نافعين مع بعض... ويبدأ واحد فيهم يحاول يغير التاني عشان يبقى زيه والتاني يبدأ يضحي أو يتخلى عن شخصيته عشان العلاقة تكمل... وفي الأخر لا اللي اتغير بيبقى راضي لأنه بيبقى شايف نفسه مش نفسه! ولا التاني بيبقى مبسوط لأنه بيحس إن كل ده مزيف fake أصلا وإنه مفيش فايدة وإنه زهق من المحاولة أساساً!!

عشان كده لو لقيت نفسك مابقتش عارف نفسك في العلاقة اقف! اقف ودافع عن نفسك! دافع عن الشخص اللي جواك اللي مضى عقد الجواز من الأول! دافع عن أحلامه وطموحه اللي اتجوز بيها وكان نفسه يكمل حياته بيها! ساعده يفضل موجود ويحس بقيمته وتميزه ودوره عشان لو خبيته أو أجبرته يبقى حد تاني... هتخسره! هتخسر نفسك فعلا لأنك بقيت زيك زي كل الناس اللي بتقمعها طول النهار عشان تتغير وتبقى حد تاني!

ولو لقيت نفسك انت اللي بتحاول تغير core values عند الطرف التاني وبتفرض دايما عليه طريقة تفكيرك وشعورك وقيمك ونظرتك للأمور وعايزه يبقى واحد تاني.. افتكر دايما إن الصفة اللي انت عايز تلغيها دي هي اللي شدتك فيه من الأول! وافتكر إنك مادخلتش في علاقة مع نفسك! إنت دخلت علاقة من طرفين.. كل واحد فيها له شخصية وتفكير مختلف ودوركم إنكم تحترموا الاختلاف ده وتحاولوا تستفيدوا منه وكل واحد يؤثر في التاني مش يلغيه! ولو مش قادر تتحمل ولا تشوف في اختلافكم عن بعض أي ميزة.. يبقى إنهي العلاقة لكن ماتنهيش البني آدم! سيبه يبقى نفسه!

وافتكر دايما إن لا مراتك دي بنتك ولا زوجك ده إبنك عشان نتعامل على إن الشخص ده عجينه وبنشكلها! محدش بيحب يتجوز باباه ومامته! وحتى ولادك نفسهم بيبقوا شخصيات مختلفين عنك ‪.

وأهم حاجة... افتكر إنك لما تغير الطرف التاني ده بالعافية.. هيطّفي ومش هتعرفه! وهو لو اتغير فعلا وخسر نفسه... مش هيبقى عايز يعرفك ‪

ربنا يصلح بيوتنا يا رب ‪