كله بالحنية بيفك

لو الست اللي معاك شخصيتها قوية، ماتحاولش تكسرها بالعند والخناق والخصام والتسلط، عشان تحس برجولتك عليها.. حبها بس، وخليك حنين عليها وهتتفاجأ قد إيه هتعمل كل حاجة عشان تريحك وهي مبسوطة ‪

كل ست مهما كانت دماغ وشخصية وإيجو ورأي واستقلالية ووو.. عايزة راجل تسيب كل الهيلمان ده على باب علاقتها بيه، وتطّلع كل ذرة أنوثة فيها معاه! تطلع الطفلة والحبيبة والأم والعاشقة والمنحرفة كمان، بمنتهى السهولة والحب. دي الفطرة أصلا. وكل ما إنت هتكّبر الست اللي معاك، كل ماهي هتكبرك، مش عشان هي ضعيفة أو خايفة أو محتاجة لك.. لكن عشان هي بتحبك وعندها من القوة والثقة في نفسها إنها تبقى مبينة ضعفها كده قدامك! هي دي القوة الحقيقية ‪.

قوة الإنسان عمره مابيكون في الإيجو العالي اللي عنده! الإيجو بتاع الواحد بيطلع اصلا أما بيبقى حاسس بعدم أمان! أما يحس إنه it’s not safe إني أسيب إيدي مع الشخص ده. إني أبقى على طبيعتي قدامه، أبين له ضعفي وحبي ومشاعري واحتياجي له. ساعتها بيطلع العنف والحدة اللي بتضايقك كراجل وبتخليك تحاول تكسرها بالعافية، وتدخل انت وهي في دايرة مفرغة من العند وتنشيف الدماغ! لو فهمت انت ليه بتستفز الإيجو بتاعها، هتعرف تخليها تريحك وهي مبسوطة! إديها حب وأمان وتفهم واحتواء، هتطلع منها أجمل ست في الدنيا ‪.