قوة الأنثى

في ناس بتشوف ان اهم حاجة في البنت ضعفها! إيه ضعفها دي؟ الضعيفة دي طيب هتربي لك ولادك ازاي؟ هتواجه معاك صعوبات الدنيا ازاي؟ هتقف ازاي قدام فلان وعلان عشان مايتدخلوش في حياتكم؟ هتستشيرها ازاي في حياتك وطموحك؟! هتقف في ضهرك ازاي لو حصلك مشكلة؟!  هتشيل الليلة ازاي لوحدها لو انت سافرت ولا لا قدر الله مت!

البنت لازم تبقى قوية.. قوية بمفهوم انثوي مش مفهوم ذكوري للقوة... 

قوة الأنثى من وجهة نظري..  انها تقدر تجمع في صفاتها بين حاجتين مهمين... بين استكانتها للرجل وإنها تديله مساحة يحتويها ويكون سندها وقوتها وضهرها.. ويحس إنها مقدراه ومحتاجة له فحياتها وبتحس معاه بالأمان وإنه الsuper hero بتاعها اللي بتديله كل الحب اللي في الدنيا... بس تعمل كل ده وهي مش ضعيفة قليلة الحيلة.. وهي مش لخمة لا يعتمد عليها.. وهي مش كل موقف تجري تعيط وتقوله إلحقني ولا طلقني ولا تروح عند أهلها وتعيش في دور الضحية.. وهي مش عالة على جوزها أو ابوها ماتعرفش تتنفس من غيره وحياتها كلها بتلف حواليه! مش كفاية تبقي حلوة ومايصة وواخدة بالك من نفسك لأن كل ده بيعتاده مع الوقت..

 مهم جدا تبقي ذكية وشاطرة وحركة وبتسلكي..  تجمعي بين الحنية والمشاعر والعاطفة وبين النضج والشخصية والكرامة... تبقي دلوعة وقت اللزوم وجدعة وصاحبة موقف وقت اللزوم... يبقى ليكي رأيك وليكي احترامك وحدودك ودماغك شغالة وليكي نظرة وبتأثري في جوزك وولادك...

شوفي السيدة خديجة... كانت "السيدة خديجة" بشخصيتها وكانت زوجة الرسول وأحب الناس الى قلبه... مكانتش لا ضعيفة ولا سطحية ولا قليلة الحيلة زي كتير من النساء دلوقتي وإلا مكنش لجأ لها وسمع استشارتها أما نزل عليه الوحي أول مرة!

البنت الضعيفة بتشد الراجل الضعيف !

"A beautiful woman is a beautiful woman, but a beautiful woman with a brain is an absolute lethal combination"