فطرة المرأة والرجل

كل شخص مننا في جزء ذكوري/رجولي وجزء أنثوي في شخصيته... بس المرأة السوية بيبقى الجزء الأنثوي هو الغالب على شخصيتها.. والرجل السوي بيبقى الجزء الرجولي هو الغالب والظاهر في شخصيته!

المشكلة بقى لما الراجل مثلا يبدأ يبعد عن الجزء الرجولي ده ويميل للجانب الأنثوي! يبدأ يبقى حساس زيادة عن اللزوم مثلا زي المرأة... يبقى مسهوك زيادة... يتخلى عن دوره كمعيل لأسرته، ويخلي مراته هي اللي تصرف أكتر...يبقى منفسن ونكدي، الى آخره.. وكل ما بيميل هو للجانب الأنثوي اللي فيه أكتر كل ما مراته/خطيبته ساعتها هتلاقي نفسها من غير ما تشعر بتروح للجانب الذكوري اللي فيها... فيبدأ صوتها يعلى عليه.. مشاعرها تجف وتزهق منه... تحاول هي اللي تقود الأسرة وتخطط وتشيل هم كل حاجة لوحدها وهكذا…

والعكس بالظبط.. لو المرأة بدأت هي تروح للجانب الذكوري بتاعها... تحاول دايما هي اللي تسيطر وتخطط وتمشي الدنيا، تحاول دايما تقلل منه قدام عينيها، تحاول تستقل عنه معنويا وماديا ونفسيا وكل حاجة، تجادل في كل كلمة وتعامله بندية مثلا، كل ما هي بتروح للجانب ده كل ما الراجل بيروح للجانب الأنثوي اللي في شخصيته... 

يحأول يبقى مسالم زيادة عن اللزوم عشان الدنيا ماتخربش، يبقى حساس لكل كلمة، يسيب لها دريكسيون الحياة عشان هي اللي تسوق ويريح دماغه وهكذا.

محتاجين نرجع تاني للفطرة! للأدوار اللي ربنا خلقنا عشانها. مهما اختلف الزمان والمكان هيفضل الراجل راجل والست ست، محدش منهم أحسن من التاني بس كل واحد فيهم ليه دور لو التاني هو اللي عمله العلاقة بتبوظ، "فطرت الله التي فطر الناس عليها، لا تبديل لخلق الله، ذلك الدين القيم!"