فضفضة..

من أكتر الآيات اللي بحبها آية "والذين جاهدوا فينا لنهدينهم سبلنا"

يمكن عشان انا شخص بيغلط كتير. أوي! بغلط كتير فعلا! بقوم وبقع كتير! بتخبط كتير! جريئة ومتمردة بنسبة كبيرة ومجنونة وعفوية جداً وبحب أجرب! من وانا صغيرة لو خوفوني من الحته الغويطة في البحر، لازم اروحها! لو حطيت حاجة في دماغي لازم اعملها! لو شفت حدود مرسومة لازم أجرب أعديها! مش عِند تماما اد ما أنا مش بحب القيود ولا القواعد.. وبحب أشوف بنفسي.. وبحب أجيب اخر الحاجة حتى لو محطوط عليها مليون تحذير.. وبحب الخيال وبحب الجنان!

والصفة دي ساعات بتكون ميزة خطيرة جدا، بس ساعات كتير بتكون عيب خطير أو صفة بتلبسك في حيطان طول ما انت ماشي، وبتحطك في صراع نفسي رهيب بين الممنوع والمرغوب! صراع مع كمية التجارب اللي بتفشل وبتوجع، في سبيل إنك مش قادر تبطل فرك وتدوير على اللي انت عايزه! صراع مع كمية الاختيارات الغلط اللي بتقع فيها عشان عينك بتلمع قدام كل تجربة مجنونة! صراع مع قيود ساعات بتحتاج انت نفسك تحطها لمصلحتك، وانت في نفس الوقت مش مستحملها ونفسك تكسرها!

عشان كده بحب الآية دي جدا! بحب اتكلم مع ربنا بيها! يارب انت وعدتنا إن اللي بيجاهدوا بتهديهم السبيل! وأنا بجاهد! بحارب حرفياً! اللي شخصيته فيها الحته اللي بقول عليها دي، هو اللي هيفهم قصدي بالحرب! ومش بس قصدي على معاصي وذنوب! بجاهد أفكار وتقاليد وجنان وحاجات كتير كده ‪ الموضوع أصعب بكتير من لما تكون هادي في نفسك كده وبتحب الأمان والاستقرار ‪

بجاهد في الصح عشان اثبت عليه، وعشان اقوم كل ما اتعب واتعلم وأكمل، وعشان تفضل عيني على مرادك مني ماتشتش، وعشان أفضل مركزة إني اسيب أثر كويس في وسط احباطات كتير جدا.. وبجاهد عشان معملش الغلط اللي نفسي اعمله وأقدر اعمله، بس هو هيغضبك! بجاهد عشان دماغي ماتمشيش ورا كل فكرة مجنونة تجيلها! بجاهد عشان أحجم من جرأتها وانطلاقها ومقاومتها لكل قاعدة وحبها للحرية اللي بيلبسنا في الحيط ده ‪

بجاهد! بغلط كتير يارب وبقع كتير بس بجاهد.. فاللهم اهديني السبيل