خطورة النصيحة

من خطورة النصيحة إنك تقدر تفصل نفسك وتجربتك ونظرتك وقيمك ومشاعرك إنت، وإنت بتسمع قصة حد تاني! ساعات وأنا بسمع مشكلة حد من صحابي بلاقيني بقول بيني وبين نفسي "هي إزاي مكملة باللي هو بيعمله ده!" أو "هو إيه اللي جابره على كده!" بس الحقيقة اللي اتعلمتها إن ماينفعش حد يحكم على علاقة اثنين ببعض ابداً! كل couple ليهم طريقتهم في الحب والعلاقة..

في ناس أعرفهم، من برّه حياتهم هادية ومعاملتهم لطيفة جدا.. وهما فعلياً مش مبسوطين مع بعض ومؤخراً إتطلقوا..وناس أعرفهم برضه مقطعين بعض خناق وخصام وكلام صعب جداً وكل خناقة يقولوا نتطلق وأنا أقول كده خلاص خلصت أكيد! مستحيييييل بعد اللي حصل ده يرجعوا! وفي الأخر بيتصالحوا ويرجعوا ‪

انت بتحكم من نظرتك انت اللي مفيهاش معايشة لحياتهم هما! كل couple بيحبوا بعض بطريقة مختلفة، وبيستحملوا من بعض اللي ممكن انت ماتستحملوش.. وبيتقبلوا حاجات مختلفة عنك.. وبيتخانقوا ويتصالحوا على حاجات أو بطريقة ممكن تبقى مش مفهومة تماما بالنسبة لك..

هما غالبا اصلاً مش بيورولك الحلو ‪ مش بيحكولك عن وقت الهزار والشقأوة والدلع.. إنت مابتشوفش منهم غير لقطة الخناق والمشاكل والكلام اللي بيطلع في الضيق وبناءً عليه ممكن تشوف علاقتهم صعبة وغريبة، لكن الواقع إن هما بيحبوا بعض بطريقة مختلفة عنك! وفي بينهم بوند معينة ومشاعر وحاجات حلوة ورا الخناق ده، إنت مش شايفها! هما متعودين ومرتبطين ببعض كده مهما قالولك حاجة تانية، وكل المطلوب منك إنك تدرك القصة دي وتبطل تحلل وتنصح نصايح متفصلة على مقاسك لحد بتعجبه تفصيلة تانية أصلا! #إطلع_إنت_منها ‪