خطوة واحدة

عمري ما كنت بخاف من المرتفعات ابداً طول عمري، لحد ما دخلت في النص التاني من العشرينات. فجأه بقيت بخاف وضربات قلبي بتعلى وبدوخ ومرة على مرة بقت بتقلب ب  Panic attacks لما اجي أعمل أي أنشطة عالية..

الموضوع ده كان مؤثر فيا جدا مش عشان أنا قررت أعيش في ناطحة سحاب ولا حاجة  بس عشان أنا مش بحب الخوف يتحكم فيا كده! بتضايق وبتعصب لما بحس إني نفسي أوي اعمل حاجة ومش بعملها بس عشان خايفة!

من اسبوع كده كنت في دهب وقررت اقفش على نفسي وأواجه مخاوفي والكلام اللي بقولهولكم في الپوستات ده، واعمل mountain climbing مش هضحك عليكم حاولت ارجع في كلامي ٣٧ مرة.. وشتمت بالأب والأم كتير وأنا طالعة الجبل وجالي بقى Panic ومكنتش هكمل وليلة كبيرة سعادتك، بس بصراحة ال Leader اللي كان معانا كان عالمي.. وهادي.. وعميق، قال لي الجبل عامل زي الحياة، بتواجهك فيها مصاعب وكل اللي محتاجة تفكري فيه الخطوة الجاية اللي تقدري تعمليها. لو بصيتي فوق أوي على قمة الجبل هتحسي إن المشوار لسه طويييييل وممكن تيأسي. ولو بصيتي تحت هتخافي وهتدوخي. كل اللي مطلوب منك تحددي الاتجاه وتدوري على خطوة واحدة ممكن تثبتي رجلك عليها ولما تطلعيها نفكر في اللي بعدها.

ممكن حد يفكر إن التشبيه بالحياة مش بالسهولة دي لأننا واحنا طالعين الجبل بيبقى معانا ليدر 

يوجهنا ويعلمنا وبنبقى مربوطين بحبل يخلينا حتى لو وقعنا نبقى برضه في أمان.. وده حقيقي 

بس هو في الحياة، انت معاك ربنا، اللي أحسن من أي Leader بتبقى موصول بحبل الله اللي أقوى من أي حبل فمهما وقعت ومهما قابلك، انت في رعاية الله وحفظه.. واللي في رعاية الله وحفظه، ماينفعش يخاف مهما وقع.