حلوة البدايات؟

حلوة البدايات؟

علاقات الحب بتبقى دايما حلوة في أولها. اكتشاف الشخص والمغامرة والخطوات الأولى في كل حاجة والمشاعر المتوّهجة والهرمونات وال fire وال butterflies وكل حاجة بتبقى جميلة! أحلى شخصية عندك بتطلع.. أكتر حب واهتمام وحنية وصبر وشغف واهتمام بالتفاصيل ومدح وكلام حلو وهدايا ومفاجأت.

المرحلة دي بتفضل جميلة كده لحد ما -زي أي حاجة في الدنيا- العلاقة بتدخل مرحلة "البلاتو" الكيرڤ فضل يعلى يعلى وبعدين الدنيا بدأت تستقر. بدأ يبان لك عيوب الشخص.. بدأت الهرمونات تهدى وهنا بقى في مرحلة البلاتو، بيظهر نوعين من الناس:

١- واحد بيستسلم تماما للمرحلة دي ويبدأ يتعامل في العلاقة بملل. يديك وش المشغول على طول، مش مركز، ملوش في الرومانسية والحركات (عكس الأول طبعا)، مابيعرفش يطبطب ويدلع، مش محتاج يعمل حاجة عشان يثبت لك إنه بيحبك ما انت أكيد عارف! بس ممكن نتكلم عن العيوب عادي جدا...وإلخ إلخ من التصرفات اللي كلها تنمّ عن ملل وفقدان للشغف! وتقف انت مستغرب راح فين الشخص الأولاني؟ الشخص الأولاني ده كان واحد تخصص ال sugar high. هو عايز الحبّة اللي في الأول دول وبعد كده بيريّح.

٢- الثاني بقى واحد أستاذ ورئيس قسم. واحد فاهم إن life is a marathon not a sprint! فاهم أولا إن البلاتو ده مرحلة طبيعية في العلاقة وإن الفرق بينه وبين ال loser الأولاني هو طريقة تعامله في الوقت ده. اللي بيريّح وقت الركود بيقع، إنما اللي بيخطط ويبذل مجهود بيسبق! وده ينطبق على الشغل حتى! فالأستاذ ورئيس القسم ده وقت البلاتو مش بيريح! ده بيركز إنه إزاي يطلع منه هو والطرف الثاني. إزاي في ظل مشاغله، يفضل يدي حب فريش، مش حب بايت حمضان  يفضل محسسها إنه بيحبها بعد سنتين تلاته عشرة.. أكتر حتى ما حبها في أول العلاقة، وتفضل هي تحسسه إنه لسه رقم ١ عندها قبل حتى عيالها وشغلها.. يبذلوا مجهود إنهم أصلاً يضاعفوا الاهتمام والدلع بتاع الأول -حتى لو بتكلّف شوية- عشان الملل اللي بيزق نفسه بالعافية في العلاقة ده يمشي. ودول طبعا بيطلعوا من البلاتو ده بعلاقة أقوى بكتير من الأول. 

وطبعا ماننساش المقولة الشهيرة: it takes two to tango! يعني عشان نخرج منها، محتاجين اثنين مركزين مش واحد.


Leave a comment

Please note, comments must be approved before they are published