تقبَّل بشريتك

كلنا فينا شروخ وكل واحد فينا شروخه مختلفة عن التاني، مفيش حد كامل ولا حد مثالي ولا حد عمره ما بيغلط!  واحنا بنختار: يا نتقبَل بشريتنا وقصورنا ونحاول نصلح من الشروخ دي أو نستغلها عشان نتعلم ونفيد غيرنا.. يا بنخاف من عيوبنا أو بننكرهم أو بنحتقر نفسنا عشان فينا عيوب، ونفضل ندوّر على المثالية ونجلد في نفسنا لحد ما نيأس ونُحبط ونعطل تماما وندمر ثقتنا ونظرتنا لنفسنا!

احنا بشر وفينا عيوب وهيفضل فينا عيوب وهنفضل نغلط. ربنا ماخلقناش ملايكة ولا كائنات مثالية! ربنا قال لنا إننا هنغلط وعلمنا ازاي نتوب ونصلح الغلط ده لما يحصل، لأنه كده كده هيحصل! وده كمان في الأخطاء اللي في حق ربنا زي التقصير في فروض وحرام وحلال، ما بالك في الأخطاء والعيوب البشرية العادية؟ فلانة حساسة زيادة، فلان مش منظم، فلانة مانجحتش في الامتحان، فلان دخل المشروع وخسر.. كلها "شروخ" بشرية بتحصل لنا كلنا، المفروض نتعلم منها ونطوّر من نفسنا لما تحصل.. مش نكره نفسنا لما تحصل! لأنها هتفضل تحصل طول ما احنا عايشين..

انت شخص له قيمة مهما اتحطيت في ظروف أو أخطأت في حاجات.. ومهما كنت مختلف في تفكيرك وشخصيتك واختياراتك عن باقي الناس. تقبَل بشريتك وسامح نفسك على تقصيرها واصبر عليها، وقدّر إنها بتحاول وبتجاهد عشان تتعلم وتصلح وتساعد غيرها مهما ده أخد وقت. حِبَها بشروخها زي صاحبك اللي عارف ومدرك عيوبه تماماً.. وبرضه بتحبه.