بناء الزواج

الزواج في الشرع يعني البناء.. ودكتور” چون جوتمن“ شبَّه علاقة الزواج بالبيت فعلا اللي قايم على عواميد وأسقف.

العواميد الأساسية هما: الالتزام بالعلاقة وتحسينها.. وثقة الطرفين في بعض وفي حرص كل طرف منهم على إشباع إحتياجات الطرف التاني.

الأسقف والأدوار اللي البيت قايم عليها هما:

١- الصداقة: وهي مدى معرفة الطرفين عن بعض.. عن أحلامهم وطموحاتهم.. عن أفكارهم وحياتهم.. عن بيحبوا إيه بيكرهوا إيه وهكذا من طبيعة علاقة الصداقة اللي بتبقى بينا وبين أصحابنا مثلا.

٢- الإعجاب: معناه ببساطة إن كل طرف "عارف" الطرف التاني و"معجب" بيه.. معجب بيه يعني شايف مميزاته أكتر ما شايف عيوبه وبيعبر عن إعجابه ده في المواقف المختلفة في العلاقة.‪

٣- التيم ورك: إن الطرفين - مهما كانوا مختلفين - يبقو بيكملوا بعض. يبقو بيتعلموا من بعض وبيأثروا على بعض بشكل إيجابي. يبقى كل واحد فيهم شخص أفضل لأنه في العلاقة دي. يبقى محمد + سارة أحسن من محمد لوحده وسارة لوحدها.

٤- القدرة على إدارة المشاكل والاختلافات: وده سقف مهم جدا في بناء الزواج لأن مهما كانت الجوازة ناجحة وسعيدة.. بيحصل خناقات ‪ بس الفرق إن لما بيكون السقف ده في البيت متين، البيت مش بيتهد.