اللي فيه طبع مابيتغيرش؟

محتاجين والله نتقبل إن من الحاجات في الدنيا اللي مش هنقدر نغيرها تصرفات الناس اللي حوالينا، أقصى حاجة ممكن نحاول نأثر فيهم.. بس مش هنقدر نغيرهم!

واحدة اتعودت إن شغلها وأهلها وأولادها وأصحابها وأي حاجة أهم من جوزها! دي قناعتها وده طبعها. مهما الراجل وضح لها إنه يحب يحس إنه أولوية عندها.. إنه محتاجها تدلعه.. مهما حايل وجاب هدايا.. مهما قفش واخد مواقف ولا هدد إنه هيتجوز عليها.. حتى والله لو اكتشفت إنه يعرف غيرها.. آخرها هتظبط فترة وبعدها أول ما الدنيا تهدى، هترجع ريما لعادتها القديمة! ليه؟؟ لأن المشكلة جوه دماغها هي.. في طريقة تفكيرها وأولوياتها!

هل ده معناه إن اللي فيه طبع مابيتغيرش؟ لا ممكن يتغير "لو هو قرر يتغير!" مفيش حد بيغيّر حد ولا بيشكّله ولا بيحوّله غصب عنه! لو البني آدم:

١- مش مقتنع إن تصرفاته غلط ومحتاج يغيرها 

٢- ما أخدش قرار وبذل مجهود وسعى إنه فعلا يغيرها... يبقى مفيش حاجة هتتغير

إحنا بنتغير ب ٣ حاجات:

 3Ps: Pain- Pressure- Perspective

Pain الألم

يعني ألم.. حاجة وجعتنا، موقف ضايقنا خسارة خسرناها فقررنا إننا نتغير. بس مجرد ما الألم أو الضيق يروح، وارد جداً نرجع تاني!

Pressure الضغط

يعني حاجة أو حد ضغط علينا! شخص بنحبه هددنا إنه هيمشي، حاجة حصلت إضطرتنا إننا نتغير وهكذا.. وبمجرد ما الضغط ده هيروح، وارد جداً نرجع تاني!

 أومّال إيه أقوى دافع للتغيير؟ 

Perspective نظرتك 

إن نظرتك تتغير، تفكيرك يتغير، قناعاتك تتغير. ممكن من نفسك كده أو بكلام مع حد أو موقف يحصلك في ألم أو ضغط بس يوصلوك إن نظرتك نفسها تتغير مش مجرد تتحمس كرد فعل وخلاص.

هي هتتغير فعلا لما تقتنع من جواها إن أولوياتها مضروبة بالنار سواء ده نتاج تربية معينة أو أي سبب تاني بس هتأدي في النهاية إن العلاقة تبوظ. محتاجة تقتنع إنها زوجة وحبيبة قبل ماتشوف نفسها أم عشان النظرة دي هي اللي تخليها تظبط نفسها وزوجها.

من الآخر يعني، ماتتعبوش نفسكم مع ناس ال perspective  بتاعهم نفسه في مشكلة  الرؤية في حد ذاتها عكس رؤيتك. ف يا تتغيروا إنتم، يا تتكيفوا مع طباعهم وتبصوا على الحاجات الحلوة وتستحملوا وتصبروا وتحاولوا تأثروا فيهم، يا تسيبوهم وتمشوا.

“You can’t change someone who doesn’t see an issue with their actions. You can only change how you react to them!”