الصداقة والاحترام ونجاح العلاقات

من الحاجات المهمة جدا واللي بتحدد مدى قوة التفاهم بين ال couple مع بعض.. ومدى احتمالية نجاح العلاقة بينهم.. هي قدرتهم على استخدام ما يسمى بال repair attempts وقت المشاكل!

فكرة ال repair attempts هي نفس فكرة فرامل العربية... وانت سايق بسرعة أو حاسس إنك بتفقد السيطرة.. على اد ما انت شاطر في التقليل السرعة والفرملة بالشكل المناسب على اد ما احتمالية انها تعدي على خير هتكون أكبر...

العلاقات اللي بيسموها emotionally intelligent هي اللي الاثنين فيها بيقدروا يستخدموا وكمان يستقبلوا ال repair attempts المناسبة وقت الخناق عشان الخناقة تهدى وماتكبرش اكتر من اللازم... ومحاولات التهدئة دي ممكن تكون بالكلام الحلو المباشر "انا بحبك- انا اسف- انا فعلا غلطان- انا مقدرش على زعلك- ممكن حضن وهكذا.." وممكن تكون باستخدام العقل والمنطق "خلينا نحاول نوصل لحل وسط- ازاي أقدر أصلح الموقف- أنا فهمت قصدك- وهكذا.." وممكن تكون بالتعبير بصدق عن المشاعر "أنا فعلا حزينة- انا مش حاسس إنك جنبي- ممكن تقولي إنك بتحبني- أنا حاسس اني مضغوط- أنا محتاجك تسمعيني - أنا محتاج اخد بريك وهكذا.."

كل دي مجرد أمثلة ممكن تبان سهلة بالكلام! لكن مدى استعداد الطرفين ومهارتهم فإنهم يستخدموها للتهدئة فعلا وقت سخونة الخناقة أو يستقبلوها ويهدوا بيها فعلا مش بتتحدد فقط على حسب هما بيحبوا بعض ولا لا... لأن في ناس بتحب بعض جدا بس اي مشكلة تافهة بينهم بتكبر بسرعة! فالأهم من الحب في اللقطة دي هي اد إيه الاثنين أصلا صحاب.. عارفين بعض كويس وفاهمين انا لو قلت إيه التاني هيهدى.. أو افهم الثاني ازاي مشاعري بحيث يقولي كلام يهديني! انت ممكن تكون بتحب عربيتك جداااا بس مش فاهم اما الفرامل تسيب أشد الهاند بريك ولا أموَر الفيتيس ولا أشيل المفتاح!

الحب والصداقة والاحترام هما أساس العلاقات الناجحة!