الشخصيتين اللي جواك

مهم تفرق بين جزئين فيك:

ال true self بتاعتك هي شخصيتك اللي جت من جيناتك، هي الحاجات اللي بتحبها بجد، مش بتعملها لمجرد إنك متأثر بالمجتمع اللي حواليك، هي الصفات اللي بتشكل شخصيتك، هي مشاعرك وانفعالاتك، هي الجزء اللي فيك اللي مش بيدور يرضي الناس ازاي، أو يحكم عليهم بإيه، أو يعمل إيه عشان يتجنب نقدهم، هي الجزء التلقائي اللي على فطرته جواك، هي بصمة شخصيتك وهويتك الأصلية اللي مكانتش هتتغير، سواء انت اتولدت في مصر ولا فرنسا، ابن أمير ولا ابن غفير. هي «إنت» مجردة من أي إضافات، خيارات زيادة. هي روح شخصيتك نفسها.

الـ social self، هي الجزء المكتسب اللي فيك. الجزء اللي اكتسبته من التربية والتجارب والبيئة المحيطة بيك. الجزء اللي بيتطور، ويتغير مع الوقت والأماكن والناس المختلفة. الجزء اللي بيقولك انت "المفروض" تعمل إيه عشان تبقى مقبول في المجتمع، أو عشان تنجح. هي أفكارك وقناعاتك اللي اتشكلت بالبلد اللي انت فيها، والثقافة اللي اتعرضت لها، والرأي الجمعي حواليك. هي المهارات الاجتماعية اللي اكتسبتها، والوسائل اللي اتعلمتها عشان توصل لأهدافك.

الإنسان مايقدرش يستغنى عن جزء من الإثنين دول في شخصيته!

الـ true self، هي فطرة الإنسان اللي بتوجهه يروح فين، والـ social self هي المهارات اللي اكتسبها، والوسائل اللي بيستخدمها عشان يوصل!

الـ true self، إنت مولود بيها، وهي الجزء الأصيل في روح شخصيتك، واللي مش بيتغير. إنما ما بين ولادتك واللحظة اللي بتقرا فيها الكتاب دا، الـ social self اتعلمت تتعايش، وتلبس، وتتكلم، وتمشي، وتركب عجلة، وتسوق عربية، وتقف في طوابير، وتبتسم في المناسبات، وماتقلدش سبايدر مان في الحقيقة عشان هتموت، وماتعضش مدام عفاف بتاعة شؤون الطلبة، عشان مايصحش.. اتعلمت أي حاجة ممكن تخليها مقبولة أكتر اجتماعًّيا.

ايوه يعني اعمل إيه دلوقتي يا استاذ غسان؟؟

من كتاب #شهرزاد_أون_فاير