الخلافات الزوجية وإدارتها

چون جوتمان خبير العلاقات الزوجية اللي عمل دراسة على ٤٠٠٠ شخص تابعهم ٤٠ سنة لقى إن عامل مهم جدا ومشترك بين كل الجوازات اللي كانت ناجحة وسعيدة في دراسته هو إنهم كان عندهم مهارة إدارة الخلاف ما بينهم conflict management skills!

الأزواج السعداء في حياتهم مش اللي مش بيتخانقوا ولا بيختلفوا لأن كده كده هيحصل خلاف ‪ اثنين بشخصيات مختلفة واراء وطباع اتجمعوا في بيت واحد طبيعي يبدأ يحصل خلاف. فالشطارة مش إننا نحط توقع مراهق غير واقعي إننا مش المفروض نختلف اصلا، الشطارة في ازاي وسط التحديات اللي بنمر بيها نوصل لاتفاق يخلينا احنا الإثنين مبسوطين مع بعض وحياتنا مستقرة قدر ما يمكن ‪

طيب إيه هي مهارات إدارة المشاكل؟

أولا لازم نفرق بين "أنواع" الخلافات الزوجية لأنهم مش زي بعض ‪ بناءاً على الدراسة الطويلة جدا دي جوتمان بيقول إن في نوعين من المشاكل:

١- مشاكل قابلة للحل لأنها قائمة على موقف معين أو فترة معينة.. لما يخلص الموقف المشكلة هتخلص... ودي ٣١٪ بس من مشاكلنا!

٢- مشاكل مزمنة غير قابلة للحل وهتفضل تواجهنا طول حياتنا لأنها قائمة على فروق في الطباع والشخصية نفسها... ودي ٦٩٪ من مشاكلنا!

هديكم مثال على الاتنين:

١- المشاكل القابلة للحل زي مثلا إن نكون لسه معزلين في بيت جديد فبنتخانق عشان مش لاقيين مكان الحاجات، بمجرد ما الدنيا هتترتب المشكلة هتنتهي. أو يكون طرف من الإتنين بيمر بظروف معينة مخليه أقل تواجد أو مقصر في العلاقة الحميمية، بمجرد ما الظروف دي هتعدي المشكلة هتتحل.

٢- المشاكل المزمنة هي اللي قائمة على فروق الشخصيات. هو منظم وهي مهرجلة، هو حريص وهي مسرفة، هو عملي وهي عاطفية، هو بيحب القرب أوي وهي بتحب مساحة الحرية وهكذا...

الفكرة إن وجود فروق الطباع (واللي ساعات بتبقى عيوب في الشخصية) ده في حد ذاته مش هو اللي بيعمل المشكلة لأن دايما هيكون في فروق في الطباع! اللي بيعمل مشكلة هو عدم التقبل ومحاولة الطرفين إنهم يغيروا بعض بالعافية وكتر التركيز على الفروق دي لحد ما حياتنا تتحول لانتِ أصلك عاطفية أوي وانا عملي فمش هينفع نكمل!

لما بنيجي نتجوز، إحنا فعليا بنختار شريك الحياة اللي فيه مجموعة "المشاكل المزمنة" اللي نقدر نتكيف معاها... مش اللي مفيش بينا اي مشاكل أو فروق خالص. كل بني ءادم فيه عيوب، الفكرة في إيه اللي ممكن نتحمله ونعيش معاه؟