الحب بنضج

طيب انتِ بتحبيه ما اختلفناش... بتحبيه وبتحبي حبه ليكي وبتحبي الحالة اللي انتو فيها والفاير والپاشون والجنان والحركات وووو.. طيب تعرفي تبصي له ثانية واحدة بعين objective متجردة شوية؟ بعين الزوج مش الحبيب؟ بعين هل أنا بجد هرتاح مع الشخص ده بصفاته ومميزاته وعيوبه بعد ما لقطة الجنان دي تهدى؟ هل هنبقى صحاب؟ هنعرف نحكي لبعض ونتكلم ونهزر ونخرج زي ما احنا بعد ٤-٥-١٠ سنين من جوازنا؟؟ هنفهم بعض ونحتوي بعض ونبني رصيد عند بعض بمعاملتنا يوم بيوم في حياتنا؟ هنضيف لبعض ولا طرف واحد بس هو اللي هيبقى بيدي والتاني مريّح؟ هنتقبل اختلافاتنا ولا واحد فينا هيبقى دايماً مستني التاني يتغير؟

بصي له كويس، مش بمراية الحب العامية.. بمراية الحب الناضج! بصي لعلاقته بأهله وبصحابه وبالناس اللي بيشتغل معاهم، وبيكي انتِوقت الزعل والمشاكل. بصي له كزوج، لأنك دايماً هتلاقي حد يحبك وتحبيه. المشاعر مش صعب إنها تتحرك تجاه شخص. بس السؤال الأهم: هل الشخص ده مناسب فعلا؟ ولا المشاعر دي اتحركت في اتجاه متعب ومرهق؟

مهما كنتي بتحبيه، انتِ مش هتعيشي مع "حبيب" بس. انتِ محتاجة زوج! حد يكون Marriage material زي ما الأجانب بيقولوا. محتاجة حد يشوفك كل يوم وانتِ سليمة ووانتِ تعبانة وانتِ متزوقة ووانتِ مبهدلة، وتبقي حلوة في عينه برضه. واحد يتفهم زعلك وحزنك ودموعك زي ما بيحب ضحكك وسعادتك وهيپرتك. واحد بيعيش معاكي تقلباتك ومخاوفك وجنونتك وهورموناتك، من غير ما يحسسك إنه زهقان أو إنك مريضة نفسياً أو تقيلة عليه. واحد يستجدع معاكي قبل ما يستجدع مع صحابه. واحد بيراعي احتياجاتك ومشاعرك فعلا مش بيتعامل على إنك موجودة وواخدك for granted. واحد أما بيزعل منك مش بيقسى عليكي ويهملك. واحد بيدور على إيه اللي بيبسطك ويعمله عشان بيحبك فعلا وعايزك مبسوطة.. مش بس عشان مش عايز قرف ومشاكل! واحد تحسي معاه بالأمان فعلا... مش بس بالحب. تحسي إنه "بيتك" اللي مش خايفة تقولي قدامه حاجة ولا محتاجة تخبي حاجة فيكي عشان يفضل يحبك.

الجواز علاقة مش سهلة. علاقة بتقضي فيها تلتين عمرك -كل يوم- مع شخص تاني. مش معنى كده إننا نخاف أو مانتجوزش أو نتخيل إننا صعب نبقى مبسوطين. معناه بس إنك ماتخليش مراية الحب تعميكي. ماتختاريش حد بقلبك لوحده. ماتتجاهليش عيوب كبيرة شايفاها في شخصيته عشان المشاعر وخداكي! لازم تبقي حاسه إن "صفات" الشخص ده هتريحك وملائمة لشخصيتك وظروفك وحياتك وإنه هيكون ليكي "سَكَن" وحضن وضهر وصاحب وحبيب... وحتى لو اتغير أو ماطلعش كده في الاخر مش هتندمي، لأنك عارفه إنك أخدتي بالأسباب وعملتي اللي عليكي واخدتي قرار بنضج ‪