التخلي عن وهم دوام الحال

من الحاجات المريحة في الحياة، هي إنك تتخلى عن وهم دوام الحال.

الحياة بطبيعتها متغيرة والتغيير ده هو الأصل وهو سنة الكون.. "يولج الليل في النهار ويولج النهار في الليل لما الواحد بيبقى في مشكلة أو ضغط بيبقى حاسس إن دي نهاية العالم وإن الحزن مش بيخلص وب Over Identify  مع المشاكل دي لدرجة إنها بتسرطن حياته كلها وبتعميه عن حاجات كتير تانية حلوة وبينسى إنها مهما طالت، فهي مش دايمة. هتعدي وبعد ما كانت كبيرة أوي في عنينا، مع الوقت هتصغر وهتبقى ذكرى في حياتنا. الفكرة دي مش بتخليك تتنطط من الفرحة.. بس بتخليك تسعى في الحلول وانت عندك صبر وتفائل وطمأنينة إن الليل ده مهما طال، النهار مسيره هيطلع.

والإدراك ده مريح على فكرة حتى أوقات الفرح. لما بتفكر إن اللحظة الحلوة دي مسيرها هتخلص، بتبقى عايز تتبسط بيها أكتر حاجة. بتغمض عينك عن أي حاجة ممكن تكدرك وبتحاول تبقى حاضر فيها وت  Enjoy it While it lasts . لما بتبقي عارف إن مفيش حاجة Happily ever after زي ما الكارتون بيقول، بتظبط ميزان التعلق عندك عشان بتبقى عارف إن التعلق الزيادة أوي هيكسرك لو الحاجة الحلوة دي خلصت. بتقاوم خوفك من المستقبل بإنك تفتكر إن دي طبيعة الدنيا ليل ونهار، ونهار وليل وكله بيعدي وربنا مش هيكلفك ابداً اكتر من طاقتك.. ففكك واتطمن واتبسط باللحظة، وافتكر ان دوام الحال من المُحال.