ازاي قدرت تتخطى كل الصعاب؟؟

ازاي قدرت تتخطى كل الصعاب؟؟

السؤال نفسه في حاجة غلط. مفيش حد بيتخطى "كل" الصعاب. الصعاب بتعلم في الواحد حتى لو في "الظاهر" الصعاب عدت. ممكن تكون عدت فعلا بس عدت من روحه. عدت وهي بتحفر فيه. عدت وسابت شوية آثار في قلبه وشخصيته.

اكتر جملة بقولها كل ما حاجة تضايقني "كله بيعدّي" وفعلا.. من نعم ربنا عليا إن أنا شخص بيعرف يتحرر ي let go وي move on مع الوقت مهما كنت متعلقة بالشخص/الحاجة.. يمكن لأني بشوف إن طبيعة الحياة أصلا مفيهاش استقرار. كل حاجة بتتغير وناس بتبعد وناس بتقرب وكل حد فينا بيمرّ في حياته بمواسم وفصول زي فصول السنة. توقع الاستقرار في الحياة هو نفسه اللي بيتعبنا. الجنة هي اللي اسمها دار القرار. ‪

ويمكن عشان انا مش بقدر استحمل شعور العجز والحزن كتير فبعمل كل حاجة تخليني اطلع منهم.. ويمكن كمان عشان مابقفش كتير عند الخسارة لأني ببقى من جوايا عارفه تماما إني عملت أقصى حاجة عندي. مستحيل هبعد عن شخص/حاجة وأنا عارفه إن لسه في حاجة كان ممكن أعملها.

بس بالرغم بقى من كل الكلام الحلو ده، إلا إني شايفه برضه إن الناس والمواقف والصعاب اللي عدت دي، عدت وهي بتاخد مننا حته. ممكن تبقى خدت معاها شوية صبر من اللي كان عندنا، شوية شجاعة، شوية حسن ظن، شوية طمأنينة، شوية تفاؤل، شوية براءة. وممكن تبقى خدت معاها حاجات وحشة زي شوية ضعف، عبط، بعد عن ربنا، قلة خبرة، تشتت، تعلق أو عطاء غلط، سطحية الى آخره.

الفكرة في الاخر إننا مش "بنتخطى" الصعاب وكأنها ملمستناش ‪ هي بتلمسنا وساعات كتير بتفرمنا قبل ماتعدي ‪المهم بس نحاول على قد ما نقدر إن الطوفان لما يخلص، مايسبناش خراب من جوانا ‪.

"استعن بالله ولا تعجز" ‪