ازاي أحب نفسي؟

عشان تعرفي تحبي نفسك ازاي... فكري في أي واحدة صاحبتك، وبعدين اسألي نفسك: لو عايزة تقربي من صاحبتك دي وتقوي علاقتك بيها ـ مهما كان علاقتكم حصل فيها توتر ومشاكل قبل كده ـ بتعملي إيه؟

بتصالحيها لو كانت زعلانة منك، بتهتمي بإهتماتها، بتخرجي معاها وتقعدوا ترغوا مع بعض، بتشوفي هي بتحب إيه وتحاولي تعمليهولها، لو لقيتيها متضايقة بتقفي جنبها، لو عملت حاجة كويسة بتشجعيها ولو غلطت مش بتجلديها! بتفهميها الغلط وتقفي جنبها وتقولي لها «معلش كلنا بنغلط وأنا هساعدك تصلحي اللي حصل» ... وحتى لو في مرة قسيتي عليها أوي بترجعي تراضيها لأنك يهمك علاقتك بيها تفضل كويسة.

افتكري كده أنتيمتك مثلا وافتكري بتتعاملي معاها برفق ازاي عشان بتحبيها... وبعدين فكري: ينفع تعملي كده مع أصحابك كلهم وتيجي عند نفسك تقولي لها انتِ أوحش واحدة في الدنيا ومفيش فيكي أمل؟ ينفع تبقي دعم وأمان لصحابك وتيجي عند نفسك تخليها بتخاف منك؟ ينفع تحبي الناس كلها وتيجي عند نفسك تقولي لها محدش بيحبك ولا حتى أنا؟ ينفع لما صاحبتك تغلط تقولي لها حصل خير وانتِ بتتعلمي... ولما «نفسك» تغلط تقولي لها انتِ أسوأ واحدة في الدنيا؟ ده انتِ لو قلتي كده لواحدة صاحبتك هتقطع معاكي! كم واحدة فينا نفسها «قاطعة» معاها!