إلعبي رياضة يا فوزية‪

سواء كنتي بنت لسه ماتجوزتيش ولا زوجة ولا أم ولا حتى جدة.. الرياضة!! فاضية مشغولة امرأة عاملة امرأة متفرغة امرأة متوحشة.. الرياضة!! تخينة رفيعة صحتك حلوة صحتك وحشة.. الرياضة! الرياضة عشان صحتك وعشان كمان نفسيتك! وملكيش حجة… الرياضة بقيت أشكال وأنواع ومستويات وبقيت مالية اليوتيوب ومفاضلش غير إنهم يخترعوا لنا رياضات نلعبها وإحنا نايمين! ملكيش أي حجة! إلعبي إن شاء الله ربع ساعة في بيتك كل يوم!

ناس كتير بتلعب رياضة بس عشان تخس… طب لو أنا مش عايزة أخس ألعب رياضة ليه؟؟ إلعبي رياضة عشان الرياضة بتزود طاقة المخ وبتقلل من إحتمالية إصابتك بالزهايمر اللي بقى منتشر جدا في عصرنا ده وفي سن مش كبير أوي ولا حاجة. الرياضة بتقلل من احتمالية إصابتك بهشاشة العظام اللي بقى كتير جدا وسط الستات.

الرياضة حتى بتحسن العلاقة الحميمة تخيلي؟  في بحث اتعمل في جامعة هارفرد بيقول إن ٢٠ دقيقة رياضة في اليوم بيحسن الإستجابة الجنسية عند النساء. مش بس كده ده بيزود رغبة الزوج في مراته لأنه بيعلي عند الست الطاقة والنشاط وبيحسن موودها وروحها المعنوية!

الرياضة بتحسن الهضم والحرق وبتقلل الشعور بالضغط والاكتئاب عشان الإندورفين اللي بتفرز واحنا بنلعب.. بتزود حتى الذكاء والإنتاجية! في دراسة نشرتها الكلية الأمريكية للطب الرياضي بتقول ان ٦٥ في المئة من الموظفين اللي شاركوا في الدراسة قالوا إن قدرتهم على الإنتاجية وإدارة وقتهم زادت وعلاقتهم الاجتماعية بالناس إتحسنت لما كانوا بيلعبوا رياضة كل يوم!

حتى أمراض زي سرطان الرئة والقولون والثدي نسبت الإصابة بيهم بتقل عند اللي مواظبين على الرياضة! أنا مش عايزة أعملك فيها الدكتورة هبة وأضرب النضارة وأقولك الإحصائيات والدراسات وفي أوروبا والدول المتقدمة بس من الآخر كده… عشان جودة حياتك تبقى أحلى وشكلك يفضل جميل كده..

إلعبي رياضة يا فوزية!‪